(నమస్తే ఇందూర్) కామారెడ్డి ప్రతినిధి, ఆగస్టు 05:
కామారెడ్డి జిల్లా పాల్వంచ మండలం పరిధిపేట గ్రామంలో ఇందిరమ్మ ఇల్లు మంజూరుపై వచ్చిన ఫిర్యాదుల నేపథ్యంలో జిల్లా స్థాయి పంచాయతీ అధికారి (డీఎల్పీఓ) శ్రీనివాస్ బుధవారం గ్రామంలో క్షేత్రస్థాయిలో విచారణ చేపట్టారు. గ్రామస్తుల ఫిర్యాదు మేరకు సంబంధిత స్థలాన్ని పరిశీలించడంతో పాటు, స్థానికుల నుంచి వివరాలు సేకరించి రికార్డులను పరిశీలించారు. ఈ ఘటన ప్రస్తుతం గ్రామంలో చర్చనీయాంశంగా మారింది.
గ్రామానికి చెందిన గంగయ్యకు మంజూరైన ఇందిరమ్మ ఇల్లు ప్రభుత్వ నిర్దేశించిన అర్హత ప్రమాణాలకు విరుద్ధంగా మంజూరైందని గ్రామస్తులు ఆరోపించారు. ఈ విషయమై ఇప్పటికే పలుమార్లు సంబంధిత అధికారులకు ఫిర్యాదు చేసినప్పటికీ చర్యలు తీసుకోలేదని పేర్కొన్నారు. అనంతరం కామారెడ్డి కలెక్టరేట్లో నిర్వహించిన ప్రజావాణి కార్యక్రమంలో లిఖితపూర్వకంగా ఫిర్యాదు చేయడంతో జిల్లా అధికారులు స్పందించి విచారణకు ఆదేశించినట్లు తెలిపారు. విచారణ సందర్భంగా గ్రామస్తులు అధికారులకు పలు అంశాలను వివరించారు. గంగయ్యకు సుమారు ఏడు ఎకరాల వ్యవసాయ భూమి ఉందని, కుటుంబం ఆర్థికంగా బలంగా ఉందని తెలిపారు. అలాగే ఆయన కుమారుడు తెలంగాణ రాష్ట్ర రోడ్డు రవాణా సంస్థ (ఆర్టీసీ)లో బస్సు డ్రైవర్గా శాశ్వత ఉద్యోగం చేస్తున్నారని పేర్కొన్నారు. ఇలాంటి పరిస్థితుల్లో ప్రభుత్వ పేదల గృహ పథకం కింద ఇల్లు మంజూరు కావడం నిబంధనలకు విరుద్ధమని వారు అభ్యంతరం వ్యక్తం చేశారు.
అంతేకాకుండా, గంగయ్య పేరుతో మంజూరైన ఇందిరమ్మ ఇల్లు ఆయన సొంత స్థలంలో కాకుండా గ్రామానికి చెందిన మరో వ్యక్తి దేవయ్య స్థలంలో బినామీగా నిర్మిస్తున్నారని కూడా గ్రామస్తులు ఆరోపించారు. దీనిపై పూర్తి స్థాయిలో విచారణ జరిపి వాస్తవాలను వెలికితీయాలని, అర్హులైన పేదలకు మాత్రమే ప్రభుత్వ గృహ పథకాల ప్రయోజనాలు అందేలా చర్యలు తీసుకోవాలని అధికారులను కోరారు.
ఫిర్యాదుల నేపథ్యంలో గ్రామానికి చేరుకున్న డీఎల్పీఓ శ్రీనివాస్ సంబంధిత స్థలాన్ని పరిశీలించి, గ్రామ పెద్దలు, స్థానిక ప్రజాప్రతినిధులు, గ్రామస్తుల నుంచి వివరాలు సేకరించారు. ఇందిరమ్మ ఇల్లు మంజూరు ప్రక్రియకు సంబంధించిన రికార్డులు, అర్హత ప్రమాణాలు, భూమి వివరాలు, నిర్మాణ స్థలం తదితర అంశాలను పరిశీలించారు. అవసరమైతే సంబంధిత శాఖల నుంచి అదనపు సమాచారం కూడా సేకరిస్తామని తెలిపారు.
విచారణ అనంతరం డీఎల్పీఓ మాట్లాడుతూ, గ్రామస్తుల నుంచి వచ్చిన ఫిర్యాదులను నమోదు చేసి సంబంధిత ఆధారాలను పరిశీలిస్తున్నామని తెలిపారు. అన్ని అంశాలపై సమగ్ర విచారణ నిర్వహించి పూర్తి నివేదికను ఉన్నతాధికారులకు, గ్రామ సర్పంచ్కు, పాలకవర్గానికి సమర్పిస్తామని చెప్పారు. నివేదికలో తేలే అంశాల ఆధారంగా ప్రభుత్వం నిబంధనల ప్రకారం తదుపరి చర్యలు తీసుకుంటుందని వెల్లడించారు.
ఇదిలా ఉండగా, ఈ వ్యవహారం పరిధిపేట గ్రామంలో తీవ్ర చర్చకు దారితీసింది. ప్రభుత్వ సంక్షేమ పథకాల అమలులో పారదర్శకత ఉండాలని, నిజమైన అర్హులకు మాత్రమే ప్రయోజనాలు అందేలా అధికారులు కఠినంగా వ్యవహరించాలని గ్రామస్తులు కోరుతున్నారు. డీఎల్పీఓ సమర్పించనున్న నివేదిక ఆధారంగా అధికారులు ఎలాంటి నిర్ణయం తీసుకుంటారనే అంశంపై గ్రామ ప్రజలు ఆసక్తిగా ఎదురుచూస్తున్నారు.
