చీటీల పేరుతో చీటింగ్..
-కామారెడ్డి జిల్లాలో పెరుగుతున్న అక్రమ చీటీ వ్యాపారాలు
(నమస్తే ఇందుర్) కామారెడ్డి ప్రతినిధి
జూలై 03:
కామారెడ్డి జిల్లా కేంద్రంలో జిల్లాలో గత కొంతకాలంగా జీరో చీటీలు, ప్రైవేట్ చీటీల పేరుతో అమాయక ప్రజలను మోసం చేస్తున్న ఘటనలు పెరుగుతున్నాయి. చట్టబద్ధమైన అనుమతులు, రిజిస్ట్రేషన్లు లేకుండానే కొందరు వ్యక్తులు చీటీ వ్యాపారాలు నిర్వహిస్తూ లక్షలాది రూపాయలు వసూలు చేసి అనంతరం బాధితులను నట్టేట ముంచుతున్నారని ఆరోపణలు వినిపిస్తున్నాయి. ముఖ్యంగా మధ్యతరగతి, పేద కుటుంబాలను లక్ష్యంగా చేసుకుని తక్కువ కాలంలో ఎక్కువ లాభాలు వస్తాయని నమ్మబలికి డబ్బులు సేకరిస్తున్నట్లు తెలుస్తోంది. జిల్లాలోని పలు గ్రామాలు, పట్టణాల్లో నెలవారీ చందాల రూపంలో డబ్బులు వసూలు చేస్తున్న నిర్వాహకులు ప్రారంభంలో కొంతమందికి చెల్లింపులు చేసి నమ్మకం కల్పిస్తున్నారు. ఆ తర్వాత భారీ మొత్తాలు సమీకరించిన అనంతరం ఫోన్లు స్విచ్ ఆఫ్ చేసి పరారవుతున్న ఘటనలు చోటుచేసుకుంటున్నాయని బాధితులు చెబుతున్నారు. కొందరు నిర్వాహకులు కార్యాలయాలు కూడా లేకుండా కేవలం పరిచయాల ఆధారంగా చీటీలు నిర్వహించడం ఆందోళన కలిగిస్తోంది.అధికారిక రికార్డులు, ఒప్పంద పత్రాలు లేకుండా డబ్బులు చెల్లించిన కారణంగా మోసపోయిన వారు న్యాయం కోసం తిరుగుతున్న పరిస్థితి నెలకొంది. పరువు పోతుందనే భయంతో లేదా తమ డబ్బులు తిరిగి వస్తాయనే ఆశతో చాలామంది బాధితులు పోలీసులకు ఫిర్యాదు చేయకపోవడం వల్ల మోసగాళ్లు మరింత ధైర్యంగా వ్యవహరిస్తున్నారని స్థానికులు అభిప్రాయపడుతున్నారు.
నిపుణుల అభిప్రాయం ప్రకారం చీటీలు నిర్వహించాలంటే సంబంధిత శాఖల అనుమతులు, రిజిస్ట్రేషన్ తప్పనిసరి. రిజిస్ట్రేషన్ లేని చీటీలలో డబ్బులు పెట్టడం ప్రమాదకరమని హెచ్చరిస్తున్నారు. చీటీ సంస్థకు చట్టబద్ధ గుర్తింపు ఉందా? కార్యాలయం ఎక్కడ ఉంది? ఒప్పంద పత్రాలు ఇస్తున్నారా? అనే విషయాలను తప్పనిసరిగా పరిశీలించాలని సూచిస్తున్నారు.ఇటీవల జిల్లాలో కొన్ని ప్రాంతాల్లో చీటీల పేరుతో డబ్బులు వసూలు చేసిన వ్యక్తులు అదృశ్యమైనట్లు సమాచారం. దీంతో బాధితులు తీవ్ర ఆందోళనకు గురవుతున్నారు. కొందరు తమ జీవితకాల పొదుపులను కూడా చీటీలలో పెట్టి నష్టపోయినట్లు తెలుస్తోంది. కుటుంబ అవసరాలు, పిల్లల చదువులు, వివాహాల కోసం దాచుకున్న సొమ్ము కోల్పోయి అనేక కుటుంబాలు ఇబ్బందులు పడుతున్నాయి.ఈ నేపథ్యంలో ప్రజలు అప్రమత్తంగా ఉండాలని, ఎలాంటి ప్రైవేట్ లేదా జీరో చీటీలలో చేరే ముందు పూర్తి వివరాలు తెలుసుకోవాలని అధికారులు సూచిస్తున్నారు. మోసపోయిన వారు వెంటనే పోలీస్ స్టేషన్లో లేదా సంబంధిత అధికారులకు ఫిర్యాదు చేయాలని కోరుతున్నారు. అక్రమ చీటీ వ్యాపారాలపై కఠిన చర్యలు తీసుకోవాలని ప్రజలు డిమాండ్ చేస్తున్నారు.
