-ఉమ్మడి నిజాంసాగర్ మండలంలో శరన్నవరాత్రి ఉత్సవాలు ప్రారంభం
(నమస్తే ఇందూర్) కామారెడ్డి జిల్లా నిజాంసాగర్, అక్టోబర్ 11:
ఉమ్మడి నిజాంసాగర్ మండలంలో శరన్నవరాత్రి ఉత్సవాలు ఆదివారం భక్తిశ్రద్ధలతో ఘనంగా ప్రారంభమయ్యాయి. నవరాత్రి ఉత్సవాల్లో భాగంగా తొలిరోజు అమ్మవారు బాలా త్రిపుర సుందరి దేవిగా భక్తులకు దర్శనమిచ్చారు. అమ్మవారిని దర్శించుకునేందుకు భక్తులు పెద్ద సంఖ్యలో తరలివచ్చి ప్రత్యేక పూజలు నిర్వహించారు.
నిజాంసాగర్ మండలం గోర్గల్ గ్రామంలో శరన్నవరాత్రి ఉత్సవాల సందర్భంగా ప్రత్యేక పూజా కార్యక్రమాలు నిర్వహించారు. మాజీ ఎంపీపీ పట్లోళ్ల జ్యోతి, మాజీ సీడీసీ చైర్మన్ దుర్గారెడ్డి, గ్రామ సర్పంచ్ లక్ష్మి అమ్మవారిని దర్శించుకుని ప్రత్యేక పూజలు చేశారు. అమ్మవారి ఆశీస్సులతో గ్రామ ప్రజలు సుఖసంతోషాలతో, ఆయురారోగ్యాలతో ఉండాలని ఆకాంక్షించారు.తొలిరోజు నుంచే ఆలయ ప్రాంగణంలో భక్తి పారవశ్యం నెలకొంది. తొమ్మిది రోజులపాటు అమ్మవారిని వివిధ రూపాల్లో అలంకరించి ప్రత్యేక పూజలు నిర్వహించేందుకు నిర్వాహకులు ఏర్పాట్లు చేశారు. శరన్నవరాత్రి ఉత్సవాలతో గ్రామంలో పండుగ వాతావరణం నెలకొంది. ఈ కార్యక్రమంలో భక్తులు, గ్రామస్తులు తదితరులు పాల్గొన్నారు.
